यी १४ स्थानमा नदीको जलसतह खतराको तहमाथि
— देशभर अहिले भइरहेको वर्षाका कारण विभिन्न नदीहरूको जलसतह बढ्दै गएको छ। बाढी पूर्वानुमान महाशाखाले शनिबार अपराह्न ३:३० बजेकाे मापनअनुसार १४ स्थानमा नदीहरूको जलसतह खतराको तहभन्दा माथि रहेको जनाएको छ।
विशेष गरी चितवनको देवघाटमा नारायणी नदीले खतराको तह पार गर्दै डुबानको अवस्था सिर्जना गरेको छ। काठमाडौँको बालकुमारीमा मनहरा खोला, भक्तपुरको कौशलटारमा हनुमन्ते खोला, र ललितपुरको खोकनामा बागमती नदीको जलसतह पनि खतराको स्तरभन्दा माथि रहेको छ।
यसका अतिरिक्त, रौतहट, बारा, धनकुटा, भोजपुर, सिन्धुपाल्चोक, र सुन्सरीका विभिन्न नदीहरूको जलसतह खतराको तहभन्दा माथि रहेको जानकारी प्राप्त भएको छ। स्थानीय प्रशासनलाई सतर्क रहन र नागरिकलाई सावधानी अपनाउन आग्रह गरिएको छ।
